Acaba de salir el númaru 22 de la revista "Lúnula", dedicáu al conceptu 'Desplazamientu'. Esta ye la mio aportación. Ye, amás, el poema qu'abre "La culpa y la lluz", que va tar a la venta nos próximos díes.
Baxé encontando la cabeza nos hombros de to
cola lluz clisando los güeyos,
to pelo mezclándose colo mio,
y eso fai que tenga más curves
la subida, Córdoba,
llonxana y sola,
les maletes llenes, vacia l’alma,
compartiendo asientu con un
cuerpu non conocíu, materia,
solo materia nuevo.
Esti ye’l tren más triste de la Historia de los homes
y nun me consuela sabeme l’únicu culpable.
Tu tamién vas subir sola,
iñando’l dolor, llamentando’l tiempu
perdíu, les tardes tontes de cine y tantos
otros momentos solo xustificables
por ser yo.
Atocha ye otru infiernu
non por esperáu menos dolorosu,
esti ye’l tren más triste de la Historia de los homes
y solo hai nueche nel camín de vuelta,
solo hai nueche y veo
que nun llega’l mio país,
que nun acaba de
llegar, porque lu dexé atrás pa siempre
y yá nun hai llar,
nin calor,
nin hores
perdíes
pensando qu’hai un requexín lluminosu
en mundu del que somos los amos
Y yá dixi que nun me consuela
sabeme l’únicu culpable
Tu tamién vas recorrer
Ronda, próxima estación
Bobadilla, próxima estación
Córdoba, próxima estación
Puertollano, próxima estación
Ciudad Real, próxima estación
Madrid Atocha
y vas tar pensando lo mesmo que yo,
pero nin eso mos va unir porque yá
nun hai país nin llar que mos una.
Yá sé, mante, que voi ser un esiliáu
pa siempre, que m’autoespulsé del paraísu,
perru rabiosu que se muerde,
otru ánxel fieramente humanu víctima
d’esi ser absurdu que mos habita.
Sube’l tren hacia la tierra agora desconocío,
agora estraño,
porque quien marchó nun ye
quien vuelve (nunca ye
quien vuelve).
Buscábemos la lluz. Baxemos al sur y
buscábemos la lluz. Y fo la lluz quien
mos topó
abandonaos n’asientos individuales
subiendo hacia l’agua frío y nuevo.
Abandonaos. Tan abandonaos.
Pablo Texón Castañón
0yosoybrian0 said on 3/30/08 5:37 PM …
ya tu sabes qué pienso de este poema...
relaporopi said on 3/30/08 6:27 PM …
Sobre to, asientos individuales, porque hay veces que todos sentimos que la persona que ta con nosotros ya no nos llena y nos sentimos solos aunque temos acompañaos e inconscientemente intentamos retrasar el puntu y final de algo que sabemos acabó fai tiempu. Supongo que en algún momentu de nuestra vida todos fuimos tú en esti poema.
Preciosu.
xurdefernandez said on 3/30/08 5:17 PM …
MUI GUAPU, NENU
A VER CUANDO NOS VEMOS