Nel camín

Judit tuvo buscando, dellos meses, un alquiler baratu pa poder abandonar el pisu onde vivía xunto con media docena de compatriotes, desque llegara del so país.
El trabayu díba-y bien y necesitaba sentise sola en dalgún momentu del día asina que, tomada la decisión, entamó a buscar primero pela ciudá onde trabayaba, pero nun atopó nada que pudiera pagar. Nin nel barriu más alloñáu del centru, nin nel más vieyu con edificios a nada de cayer.
Judit siguió buscando pelos pueblos de la contornada hasta onde llegara’l tren que la pudiera llevar a trabayar tolos díes enantes de qu’alboreciera; y a namás dos paraes de la ciudá (poco más de cinco minutos) atopó un pisu amuebláu nun edificiu de los años cuarenta del sieglu venti pol que-y pidíen poco más de lo que pagaba hasta aquel momentu. Tenía cuartu con cama, armariu y mesina; sala con sofá y mueble-bar; cocina con mesa y banquetes, nevera y dos fogones de gas; y bañu con bañera ferruñosa. Tenía poca pintura y tenía bombielles colgando del techu a maner de llámpara; pero miraba dafechu pa la cai y nun tenía vecinos.
La mesma tarde en que lu vio per primer vegada llegó a un alcuerdu col dueñu, y yá foi a dormir p’allá cola mesma maleta que traxera del so país debaxo del brazu.

Judit nun llevaba más d’una selmana viviendo na nueva casa, y namás intercambiara palabres con dos o tres persones nel chigre de la que volvía del trabayu de nueche y tomaba tres o cuatro copines d’anís mirando pa la televisión. Pero de la que volvía de trabayar un sábadu a media tarde atopó, delantre casa, a dos mozos a los que viera pel chigre, arreglando’l motor d’un coche grande. Púnxose a falar con ellos de nada en particular: dacuando de coches, dacuando de muyeres y homes, dacuando de fútbol, dacuando de la capital.
Anque Judit nun yera la que más falaba de los tres, apoyábase nel coche pa poder siguir atenta la conversación. Taba siendo’l meyor momento desque llegara a vivir a aquel pueblu.

No más alto del edificiu allugáu enfrente del coche y de les úniques tres persones qu’a aquella hora taben na cai, la voz d’una muyer que siguía la escena, cola lluz prendida, acompañada de dos neños rompió la tranquilidá qu’había nel ambiente. Desque viera a Judit baxar la costona que venía del apeaderu del tren los nervios fueron ganándo-y espaciu a la tranquilidá hasta que la razón desapaeció dafechu y surdieron órdenes pa que Judit se separtara del coche, pa que fuera pa so casa, pa que fuera pal so país. Tamién surdieron otres palabres contradictories que la llamaben puta y chupapolles, y que la acusaben de nun ve-y enxamás la polla a un home.
Judit separtóse del coche y tardó en contesta-y, tardó en retala a baxar si yera muyer. Los homes nun dixeron nin una palabra en tola escena hasta que se despidieron, acatando órdenes que veníen de lo cimero, pa entrar nel portal que taba enfrente del coche qu’arreglaben y de Judit, que siguió abeyando alredor del coche, espardiendo palabres de retu que nun fueron aceptaes nin esi día nin cuando s’encararon, per primer vegada, de la qu’una entraba y otra salía del estancu.
Judit, enllena de rabia, emburrió a la otra tolo que pudo que nun foi nada y la otra, interiormente intentó revelase pero siguió’l camín de casa.

To leave a comment, please log in by clicking one of the following