Nel camín

Quiciabes nun se vieren enxamás pero xuntáronse enriba de la ponte que cruza l’autopista a nada yá d’entrar na ciudá. Entá nun yeren les siete y media de la mañana y l’alborecer entá nun aportara.

Israel foi’l primeru de toos n’apaecer col enfotu de tirase al vaciu pa cayer debaxo de les ruedes de los coches. Sabía que nun-y quedaba más qu’aquello o volver pa la cárcel.
Ente los demás que fueron llegando habíalos que diben camín de dalgún llau pero que se pararon a fumar o a mirar al infinitu; habíalos que teníen tol tiempu del mundu pa ver cómo los coches, autobuses y camiones qu’entraben y salíen de la ciudá.
L’últimu que llegó namás quería colgar una pancarta que, al final, nun colgó.

Israel, anque foi’l primeru en llegar, nun pasó munchu tiempu solu. Nun pasara una pierna al otru llau de la baranda y yá vio apaecer una persona per cada llau de la ponte. A pesar de que nun cuntaba con naide al so alredor siguió p’alantre y pasó una pierna.
Volvió a mirar p’atrás y vio más xente.
Yá yeren más de catorce persones cuando pasó la otra pierna y quedó cara a cara col aire. Les manes agarraes de la baranda tembláben-y.
Nun tardó en sentir una mano que-y tocaba la espalda. Nun tardó en sentir una voz que-y falaba.
Israel nun quixo volver a mirar p’atrás.

Aquel que-y afalagaba’l costazu entamó falando del reinu de dios. Un reinu que nun yera p’aquellos que nun se quieren encarar coles torgues que’l señor-yos pon nel camín.
Israel nun tenía pensao ponese a perder nin ún de los últimos segundos que quiciabes-y quedaben en pensar nes palabres d’aquel chifláu; anque a la cabeza viniéron-y palabres de so güela que munches vegaes, de neñu, falára-y de dios.
Nun tenía pensao pidir ayuda a dios como so güela-y cuntara que facíen aquellos que taben pa morrer anque nunca creyeren nél.

Ensin atender pa lo qu’aquel que-y afalagaba’l costazu-y dicía pensó na cárcel y tuvo seguru de que quería escoyer la muerte cabo a los munchos coches que yá entraben y salíen de la ciudá.
Ensin atender pa lo qu’aquel que-y afalagaba’l costazu-y dicía pensó na muerte por asfixa de la que fuera la so muyer y prefirió la muerte qu’escoyera pa él.
Sorrió y volvió la cara p’aquel que falaba ensin ser oyíu y que pensó que les sos palabres de bon cristianu aselara al pecador.
L’últimu pensamientu d’Israel foi pa la velocidá multiplicada por el espaciu qu’acolumbraba.

Entá nun yeren les siete y media de la mañana y l’alborecer entá nun aportara. Munchos conductores qu’a aquelles hores intentaben entrar y salir de la ciudá miraben pa la concentración de persones qu’había enriba de la última o la primer ponte. Munchos d’aquellos vieron el final d’Israel (y dalgunos pasaron perriba d’él) que nun duró más de dos segundos.

To leave a comment, please log in by clicking one of the following