Nel camín

A Lola costó-y más de la cuenta entrar nel tren. Al subir los dos peldaños tuvo a nada de cayer; igual que cuando foi sentase cabo’l ventanu.
Llevaba na mano’l billete que-y podía pidir el revisor y el carné d’identidá que-y diben pidir nel destín, y qu’enseñaba una semeya que nun tenía muncho que ver coles engurries que dominaben la so cara y un nome que nun-y gustaba muncho: María Dolores («coses de madres», dixera, cuasi n’otra vida, cuando-y entrugaben). Entrambos documentos cayíen-y cada poco, y ella al dexar de sentir el so tactu nos deos abría los güeyos tolo que podía pa intentar recoyelos.
Nun sabía les nueches que llevaba ensin dormir, pero sabía que yeren munches. Nun sabía los díes que llevaba ensin cambiar de ropa, pero sabía que yeren munchos. Nun sabía la manera d’arreglar no que se taba convirtiendo la so vida; anque tampoco tenía claro que lo quisiera arreglar.

Una vez al mes, Lola dexaba la casa onde vivía pa dir ver a aquel que compartiera espaciu con ella dalgo más de dos años, pa dir ver a aquel que-y deprendió qu’entá-y quedaba dalgo de vida, pa dir ver a aquel que la convirtiera no que yera: una muyer a la que nun-y daba más nada na vida que lo tocante a aquel que la intentara matar unos meses enantes. Una muyer que nun recordaba en nada a aquella vilba que viviera nuna casa prestada nunes colomines y que tuviera que sacar alantre primero a los fíos, y llueu a los fíos y a los nietos, a los qu’había tanto que nun vía.

Aquel que diba ver tolos meses a la cárcel apaeció na so vida, de sópitu (foi’l primer home que contrató la empresa de llimpieces na que trabayaba Lola); y cuasi ensin saber cómo foi llevándola p’hacia’l so terrén. Ella dexóse facer col enfotu d’algamar la felicidá prometida y algamada, de primeres. Pero la violencia entrambos (quiciabes por mor de mecer pastilles y alcohol) apaecía cuasi cada día, siendo Lola siempre la peor parada.
La última nueche que Lola pasó con a quel que diba ver tolos meses a la cárcel acabó con ella nel hospital y él detenía polos guardies. Salváronla los vecinos de la contornada que llamaron a los guardies; anque nel xuiciu Lola cuasi nun abrió la boca.

Desque él entrara na cárcel, Lola diba tolos meses velu.
Garraba’l tren, y llueu tenía que subir la costona que-y diba llevar davezu más d’una hora. Cuando llegaba arriba esperaba que-y dieren pasu, depués d’enseñar el carné, pa tar falando con él más d’una hora.
Desque él entrara na cárcel, Lola diba tolos meses velu.
De primeres él nun quería escuchala nin dici-y nin una palabra. Pero tanto insistió ella qu’una tarde, pel tercer o cuartu mes d’encierru, volvieron a falar faciendo que la vida de Lola volviera a algamar un poco de felicidá.

To leave a comment, please log in by clicking one of the following